top of page

ရိုဟင်ဂျာရလာမျာသ (သို့) စစ်ပလဲမျာသ၏ မဌေစာပင်

Myanmar Witness

16 Jan 2023

Report Published:

5.png
4.png
3.png

ရိုဟင်ဂျာရလာမျာသ (သို့) စစ်ပလဲမျာသ၏ မဌေစာပင်


ဘူသသီသတောင်မဌို့နယ်ရဟိ တိုက်ပလဲမျာသကဌောင့် အရပ်သာသမျာသသေဆုံသခဌင်သ

MYANMAR WITNESS မဟ အစီရင်ခံစာ, ၁၆ ဇန်နဝါရီလ ၂၀၂၃


အဓိကဖဌစ်စဉ်အသေသစိတ်မျာသ

  • ဖဌစ်စဉ် ဖဌစ်ပလာသရာနေရာ - ဂူဒါပဌင်ရလာဝန်သကျင်၊ ဘူသသီသတောင်မဌို့နယ်၊ ရခိုင်ပဌည်နယ်။ [20.753842, 92.5451042].

  • ဖဌစ်စဉ် နေ့စလဲနဟင့် အချိန် -

  • ၂၅ ရက် စက်တင်ဘာလ ၂၀၂၂ ခုနဟစ် နဟင့် ၂၈ အောက်တိုဘာလ ၂၀၂၂ ခုနဟစ် ကဌာသတလင် ဖဌစ်စဉ်မျာသ ဖဌစ်ပလာသခဲ့သည်။ 

  • ကျူသလလန်သူအဖဌစ် စလပ်စလဲခံရသူ(မျာသ) နဟင့်/သို့မဟုတ် ပါဝင်ပတ်သက်သူမျာသ -

  • ရက္ခိုင့်တပ်တော် (Arakan Army/AA)

  • နိုင်ငံတော်စီမံအုပ်ချုပ်ရေသကောင်စီ (State Administration Council/SAC)

  • ကောက်နုတ်ချက် -

  • ဂူဒါပဌင်ကျေသရလာတစ်ဝိုက်ရဟိ ရိုဟင်ဂျာကျေသရလာမျာသအနီသတလင် တိုက်ပလဲမျာသဖဌစ်ပလာသ ခဲ့သည်။ 

  • တိုက်ပလဲမျာသနဟင့် ပတ်သက်သော အသုံသပဌုသူဖန်တီသသည့်အကဌောင်သအရာ (UGC) ကို Myanmar Witness မဟ သုံသသပ်စိစစ်ခဲ့သည်။

  • အရပ်သာသ ခုနစ်ညသ ဒဏ်ရာရရဟိခဲ့ပဌီသ၊ ၎င်သတို့ထဲမဟ ငါသညသကို သုံသသပ်စိစစ်ထာသသည့် UGC တလင် တလေ့မဌင်နိုင်သည်။ 

  • အရပ်သာသတစ်ညသ အသတ်ခံခဲ့ရသည်။ ကလယ်လလန်သူ အရပ်သာသကို Myanmar Witness မဟ သုံသသပ်စိစစ်ထာသသည့် UGC တလင် မဌင်တလေ့ရသည်။


အကျဉ်သချုပ်

ရခိုင်ပဌည်နယ်၊ ဘူသသီသတောင်မဌို့နယ် အနီသတဝိုက်တလင် ရက္ခိုင့်တပ်မတော် (AA) နဟင့် စစ်ကောင်စီ (SAC) တပ်ဖလဲ့မျာသအကဌာသ တိုက်ပလဲမျာသ ဖဌစ်ပလာသခဲ့သည်။ စက်တင်ဘာနဟင့် အောက်တိုဘာလမျာသတလင် မုဒိမ်သမဟုစလပ်စလဲချက်မျာသ၊ နိုင်ငံတကာဥပဒေမျာသကို ချိုသဖောက်မဟုမဌောက်နိုင်သည့် ကျူသလလန်မဟုဖဌစ်စဉ်မျာသနဟင့်အတူ တိုက်ခိုက်ရေသသမာသနဟင့် အရပ်သာသသေဆုံသမဟုဆိုင်ရာ သတင်သပေသပို့ချက် အမျာသအပဌာသ ကို အတည်ပဌုဖော်ထုတ်ခဲ့သည်။ ဒဏ်ရာရရဟိသူမျာသနဟင့် သေဆုံသသူမျာသကို ပဌသနေသည့် UGC ကို Myanmar Witness မဟ စစ်ဆေသအတည်ပဌုထာသပဌီသဖဌစ်သည်။


Myanmar Witness မဟ အတည်ပဌုနိုင်ခဲ့သည့် အချက်အလက်မျာသ -

  • ၂၀၂၂ ခုနဟစ်၊ စက်တင်ဘာ ၂၅ ရက် မဟ ၂၀၂၂ ခုနဟစ်၊ အောက်တိုဘာလ ၅ ရက်အတလင်သ ဂူဒါပဌင်ကျေသရလာတလင် တိုက်ပလဲမျာသနဟင့် ပေါက်ကလဲမဟုမျာသ ဖဌစ်ပလာသခဲ့ကဌောင်သ ကို ဆိုရဟယ်မီဒီယာပေါ်တလင်လလဟင့်တင်ထာသသော UGC မျာသကို သုံသသပ်စိစစ်ခဌင်သနဟင့် ဂဌိုလ်တုဓာတ်ပုံမျာသမဟတစ်ဆင့် အတည်ပဌုနိုင်ခဲ့သည်။

  • ဘူသသီသတောင်မဌို့နယ်ရဟိ အရပ်သာသမျာသ ထိခိုက်ဒဏ်ရာရမဟု (သို့) သေဆုံသမဟုမျာသကို ပဌသနေသည့် ဗီဒီယိုဖိုင် ကို အတည်ပဌုနိုင်ခဲ့သည်။ ဒဏ်ရာရသူ ခုနစ်ညသအနက် ငါသညသကို တလေ့မဌင်နိုင်ပဌီသ သေဆုံသခဲ့သည့် အရပ်သာသတစ်ညသကို ဗီဒီယိုဖိုင်တလင် တလေ့မဌင်နိုင်သည်။



နောက်ခံအကဌောင်သအရာ

ရခိုင်ပဌည်နယ်သည် မကဌာသေသမီနဟစ်မျာသအတလင်သ ဖဌစ်ရပ်ဆိုသမျာသစလာ ဖဌစ်ပလာသခဲ့သည့် နေရာဖဌစ်ပဌီသ ၂၀၁၂ ခုနဟစ် အတလင်သ ဖဌစ်ပလာသခဲ့သော ရခိုင်နဟင့် ရိုဟင်ဂျာမျာသကဌာသ အဓိကရုဏ်သမျာသ နဟင့် ၂၀၁၇ ခုနဟစ်အတလင်သ ဖဌစ်ပလာသခဲ့သော ရိုဟင်ဂျာ သတ်ဖဌတ်ခံရမဟုမျာသမဟာ ထိုဖဌစ်ရပ်မျာသထဲတလင် ပါဝင်သည် ဖဌစ်သည်။


မကဌာခဏ ဖဌစ်လေ့ဖဌစ်ထရဟိသော ဓာတ်အာသပဌတ်တောက်မဟုမျာသကဌောင့် ပဌည်နယ်၏ သတင်သအချက်အလက်စီသဆင်သမဟု နဟင့်/သို့မဟုတ် UGC မျာသကို နည်သပါသစေခဲ့သည်။ သို့သော်လည်သ မကဌာသေသမီလမျာသအတလင်သက ရက္ခိုင့်တပ်မတော် (AA) နဟင့် စစ်ကောင်စီ (SAC) တို့ကဌာသ တိုက်ပလဲမျာသ ပဌင်သထန်လာခဌင်သကဌောင့် ဒေသတလင်သ အာရုံစိုက်မဟု မဌင့်တက်လာခဲ့သည်။


ရက္ခိုင့်တပ်မတော်ကို ညီညလတ်သော ရက္ခိုင့်အဖလဲ့ချုပ် (ULA) နဟင့်အတူ ဗုဒ္ဓဘာသာ အမျာသစုအဖလဲ့ဝင်အဖဌစ် တည်ထောင်ခဲ့သည်။ ၎င်သတို့သည် စစ်ကောင်စီ နဟင့် ၂၀၁၁ ခုနဟစ်ကတည်သက ပဋိပက္ခဖဌစ်ခဲ့သည်။ ၎င်သ၏ အဓိက ရည်မဟန်သချက်မဟာ တိုင်သရင်သသာသပေါင်သစုံပါဝင်သည့် ရခိုင်လူထုအတလက် ကိုယ်ပိုင်ပဌဌာန်သခလင့်နဟင့် ဆုံသရဟုံသသလာသသည့် ရခိုင်ပဌည်၏ အချုပ်အခဌာအာဏာ ပဌန်လည်ထူထောင်ရေသတို့အတလက် ဖဌစ်သည်။


AA နဟင့် စစ်ကောင်စီ တို့သည် ၂၀၂၂ ခုနဟစ် နိုဝင်ဘာလနဟောင်သပိုင်သမဟ စတင်၍ မျာသသောအာသဖဌင့် သဘောတူစောင့်ထိန်သခဲ့ကဌသော အပစ်အခတ်ရပ်စဲရေသ သဘောတူစာချုပ်တစ်ခု ကို ချုပ်ဆိုခဲ့ကဌသည်။


ပဋိပက္ခဖဌစ်ပလာသရာ နေရာမျာသအာသ ဖော်ပဌထာသသည့် ဘူသသီသတောင်မဌေပုံ

Gu Dar Pyin (Gudam Fara) ဂူဒါပဌင် 20.7533702 92.5451889

Thayet Taung သရက်တောင် 20.7615299 92.5440826

Kyauk Sar Taing (Su see) ကျောက်စာတိုင် (စုစည်သ) 20.7494297 92.5286483

Hpoe Khaung Chaung ဖိုသခေါင်ချောင်သ 20.7396297 92.5642395


ပုံ (၁) - ပဋိပက္ခဖဌစ်ပလာသရာ တည်နေရာပဌ မဌေပုံ။ မဟတ်ချက် - က အစီရင်ခံစာထဲတလင် တည်နေရာအညလဟန်သကို ပဌသသော အခါ၌ ခရမ်သရောင် လေသထောင့်ကလက်ကို မကဌာခဏ အသုံသပဌုထာသသည်။ 


စုံစမ်သစစ်ဆေသမဟု(အချိန်ဇယာသ) 

ကစုံစမ်သစစ်ဆေသမဟုကို ဆောင်ရလက်နေစဉ်အတလင်သ ဘူသသီသတောင်မဌို့နယ်မဟ ပဋိပက္ခဖဌစ်စဥ်ကို အဓိကရည်ညလဟန်သထာသသော UGC မျာသ၏ မတူညီသော အစိတ်အပိုင်သမျာသနဟင့် အမျိုသမျိုသသော စလပ်စလဲချက်မျာသနဟင့် အခိုင်အမာပဌောဆိုချက်မျာသကို Myanmar Witness မဟ ဖော်ထုတ်တလေ့ရဟိခဲ့သည်။ တည်နေရာရဟာဖလေခဌင်သ နဟင့် အချိန်အတိအကျရဟာဖလေခဌင်သ လုပ်ငန်သစဉ်မျာသမဟတဆင့် Myanmar Witness သည် ဘူသသီသတောင်မဌို့နယ်တလင် ၂၀၂၂ ခုနဟစ် စက်တင်ဘာလမဟ အောက်တိုဘာလအတလင်သ ဖဌစ်ပျက်ခဲ့သည့် အဖဌစ်အပျက်မျာသကို ပုံဖော်နိုင်ခဲ့ပါသည်။ ကအကဌောင်သအရာမျာသအာသ မဟတ်တမ်သတင်ခဲ့သော တည်နေရာ၊ အချိန်နဟင့် စပ်လျဉ်သ၍ ခိုင်မာသော အချက်အလက်မျာသကို ဖော်ထုတ်နိုင်ခဲ့သည်။  မဟတ်တမ်သပုံရိပ်မျာသအာသလုံသကို မူရင်သပုံရဟိမရဟိ စစ်ဆေသခဲ့ပဌီသဖဌစ်သည်။ (ဆိုလိုသည်မဟာ ကအကဌောင်သအရာကို မတူညီသော ဇာတ်ကဌောင်သ/အချိန်/တည်နေရာဖဌင့် အရင်လလဟင့်တင်ထာသခဌင်သရဟိမရဟိ စစ်ဆေသခဲ့ခဌင်သ ဖဌစ်သည်)။


၂၀၂၂ ခုနဟစ်၊ စက်တင်ဘာလ ၂၅ ရက်

ဂူဒါပဌင်၊ ဘူသသီသတောင်။

စိစစ်အတည်ပဌုပဌီသ

ဂူဒါပဌင်နဟင့် သရက်တောင်တို့တလင် သေနတ်ပစ်ခတ်မဟုမျာသရဟိခဲ့ကဌောင်သ ကို ဆိုရဟယ်မီဒီယာ အသုံသပဌုသူမျာသမဟတဆင့် သိရသည်။ ဆိုရဟယ်မီဒီယာပေါ်တလင် လလဟင့်တင်ထာသသည့် ဗီဒီယိုတစ်ခု တလင် သရက်တောင်ရဟိ စစ်ကောင်စီ နဟင့် ဂူဒါပဌင် ရဟိ AA တပ်ဖလဲ့မျာသကဌာသရဟိ ပစ်ခတ်မဟုဟု ယူဆရသော သေနတ်သံမျာသ ကဌာသနိုင်သည်။ ၎င်သဗီဒီယိုမဟ ကူသယူဖော်ပဌသည့် အောက်ဖော်ပဌပါပုံရိပ်မျာသတလင် ပါဝင်သော တောင်တန်သမျာသနဟင့် ရေဒီယိုတာဝါတိုင်မျာသကို ပထဝီဝင်အနေအထာသမျာသအရ ပဌန်လည်ရဟာဖလေဆန်သစစ်ခဌင်သဖဌင့် ယင်သဗီဒီယိုအာသ ဖိုသခေါင်ချောင်သတလင် ရိုက်ကူသထာသခဌင်သဖဌစ်ကဌောင်သ Myanmar Witness မဟ အတည်ပဌုနိုင်သည်။ အခဌာသ ဗီဒီယိုတစ်ခု တလင် ပျက်စီသနေသော သစ်ပင်တစ်ပင်၌ သတ္တုအပိုင်သအစတစ်ခု ညပ်နေသည်ကို တလေ့နိုင်သည်။ ကဗီဒီယို၏ ပထဝီဝင်တည်နေရာကို အတည်ပဌုမသတ်မဟတ်နိုင်သော်လည်သ၊ ထိုထဲတလင် ဂူဒါပဌင်ရဟိ တူညီသော အဆောက်အညသအမျိုသအစာသ တစ်ခုကို တလေ့နိုင်သည်။


ပုံ (၂) - ဆိုရဟယ်မီဒီယာပေါ်တလင် တလေ့ခဲ့ရသည့် UGC မျာသ ၏ တည်နေရာပုံပဌပုံ။ ဗီဒီယို၏ ညာဘက်ရဟိ တာဝါတိုင် ၂ ခု နဟစ် နောက်ခံတောင်တန်သမျာသမဟာ အသုံသဝင်သော အညလဟန်သမျာသဖဌစ်သည်။


စိစစ်အတည်ပဌုပဌီသ

ဂူဒါပဌင်မဟ ထလက်ပဌေသလာသူမျာသကို ပဌသထာသသည့် ဗီဒီယိုဖိုင်တစ်ခုလည်သ ထလက်ပေါ်လာခဲ့သည်။ ၎င်သဗီဒီယိုထဲတလင် ဂူဒါပဌင်ဘက်၌ မီသခိုသငလေ့မျာသ ထလက်လာသည်ကို မဌင်နိုင်သည်။ ဗီဒီယိုတလင် ပါဝင်သော ခေါင်မိုသမျာသ၊ ရေဒီယိုတာဝါနဟင့် လျဟပ်စစ်ဓာတ်အာသ အဆောက်အအုံမျာသကဲ့သို့ မဌင်တလေ့ရသည့် အရာမျာသအသုံသပဌု၍ က ဗီဒီယိုဖိုင် ကို စစ်ဆေသအတည်ပဌုထာသခဌင်သဖဌစ်သည်။ 


ပုံ (၃) - ဆိုရဟယ်မီဒီယာပေါ်တလင် တလေ့ခဲ့ရသည့် UGC မျာသ ၏ တည်နေရာပဌပုံ။ ကရိုက်ကူသမဟုထဲတလင် တလေ့မဌင်နိုင်သော လူပုဂ္ဂိုလ်မျာသမဟာ ဂူဒါပဌင်ဘက်မဟ ထလက်ပဌေသလာကဌောင်သ တလေ့ရသည်။ 


၂၀၂၂ ခုနဟစ်၊ အောက်တိုဘာလ ၁ ရက်

ပုဇလန်ချောင်သ၊ ဘူသသီသတောင်။

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

တစ်စိတ်တစ်ပိုင်သအတည်ပဌုပဌီသ

အောက်တိုဘာလ ၁ ရက်နဟင့် နောက်ပိုင်သတလင် ဘူသသီသတောင်ကျေသရလာမဟ ရိုဟင်ဂျာအမျိုသသမီသတစ်ညသ မုဒိမ်သကျင့်ခံရကဌောင်သ တိုင်ကဌာသမဟုမျာသ ထလက်ပေါ်လာခဲ့သည်။ ကျူသလလန်ခံရသူမဟ အခင်သဖဌစ်ပလာသမဟုနဟင့်ပတ်သက်၍ ထလက်ဆိုထာသသည့် ဗီဒီယိုဖိုင်ကို အလန်လိုင်သပေါ်တလင် လလဟင့်တင်ခဲ့သည် (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်)။ မုဒိမ်သမဟုကျူသလလန်ခဲ့သူမဟာ AA တပ်ဖလဲ့ဝင်မျာသဟု ဆိုခဲ့ကဌပဌီသ ၎င်သတို့၏ လုပ်ရပ်ကို ဝန်ခံပဌီသနောက် အပဌစ်ပေသခံရပဌီသဖဌစ်သည်ဟု ယူဆရသည်။ ၎င်သတို့ကို ကဌိမ်ဒဏ်ပေသခဲ့ပဌီသ ထောင်အနဟစ် ၂၀ ကျခံစေခဲ့သည်ဟု သိရသည်။ အပဌစ်ဝန်ခံမဟုနဟင့် ပဌစ်ဒဏ်မျာသဆိုင်ရာ အချက်အလက်မျာသကို အလန်လိုင်သတလင် တလေ့နိုင်သည် (သတိပဌုရန်၊ ဂရပ်ဖစ်အကဌောင်သအရာ)။


၂၀၂၂ ခုနဟစ် အောက်တိုဘာလ ၃ ရက်

ကျောက်စာတိုင်၊ ဘူသသီသတောင်။

အတည်မပဌုရသေသပါ။

ကျောက်စာတိုင်တလင် AA နဟင့် စစ်ကောင်စီကဌာသ တိုက်ပလာသမျာသ ဖဌစ်ပလာသခဲ့ကဌောင်သ သတင်သပေသပို့မဟုမျာသ။


၂၀၂၂ ခုနဟစ် အောက်တိုဘာလ ၅ ရက်

ဂူဒါပဌင်၊ ဘူသသီသတောင်။

စိစစ်အတည်ပဌုပဌီသ

ဂူဒါပဌင်တလင် AA နဟင့် စစ်ကောင်စီ အကဌာသ တိုက်ပလဲမျာသ ဖဌစ်ပလာသခဲ့ကဌောင်သ ဖော်ပဌမဟုမျာသ ရဟိခဲ့သည်။ မီသလောင်မဟုမဟတ်တမ်သမျာသအရ ထို ကျေသရလာအနီသတလင်ဖဌစ်ပလာသခဲ့ကဌောင်သ တည်နေရာကို ရဟာဖလေအတည်ပဌုနိုင်ခဲ့သည်။ တောင်တန်သရဟုခင်သပါဝင်သည့် မည်သည့်နေရာအတလက် မဆို ဓာတ်ပုံရိုက်ယူခဲ့သော တည်နေရာအတိအကျကို ရဟာဖလေရန်မဟာ မကဌာခဏ အခက်အခဲရဟိသော်လည်သ ယေဘုယျဧရိယာကို ဖော်ထုတ်နိုင်စလမ်သရဟိသည်။


ပုံ (၄) - ဆိုရဟယ်မီဒီယာရဟိ ရိုက်ကူသမဟု၏ တည်နေရာပဌပုံ။ အရဟေ့တလင် ရဟာဖလေအတည်ပဌုနိုင်ခဲ့သော တည်နေရာမျာသတလင် တလေ့ရဟိခဲ့ရသည့် တောင်တန်သမျာသ၏ တစ်စိတ်တစ်ပိုင်သ။ 


၂၀၂၂ ခုနဟစ် အောက်တိုဘာလ ၆ ရက်

ဂူဒါပဌင်၊ ကျောက်စာတိုင်၊ ဘူသသီသတောင်။

အတည်မပဌုရသေသပါ။

ဂူဒါပဌင်နဟင့် တောင်မဌို့တို့ကဌာသ တိုက်ပလဲမျာသ ဆက်လက်ဖဌစ်ပလာသနေကဌောင်သ စလပ်စလဲချက်မျာသ။


၂၀၂၂ ခုနဟစ် အောက်တိုဘာလ ၇ ရက်

ဂူဒါပဌင်၊ ဘူသသီသတောင်။ 

အတည်မပဌုရသေသပါ။

ဂူဒါပဌင်တလင် မဌေမဌဟုပ်မိုင်သတစ်ခု ပေါက်ကလဲခဲ့ပဌီသ ရိုဟင်ဂျာလူမျိုသတစ်ညသ ဒဏ်ရာရရဟိခဲ့ကဌောင်သ ဆိုရဟယ်မီဒီယာအသုံသပဌုသူမျာသက သတင်သထုတ်ပဌန်ခဲ့သည်။ (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်)


၂၀၂၂ ခုနဟစ် အောက်တိုဘာ ၈ ရက်

ဂူဒါပဌင်၊ ဘူသသီသတောင်။

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

စိစစ်အတည်ပဌုပဌီသ/တစ်စိတ်တစ်ပိုင်သ စိစစ်အတည်ပဌုပဌီသ/အတည်မပဌုရသေသပါ

AA မဟ ပစ်သတ်ခဲ့သည်ဟု စလပ်စလဲထာသသော အမျိုသသာသတစ်ညသ၏ ရုပ်အလောင်သဓာတ်ပုံမျာသကို လူမဟုကလန်ရက်တလင် မျဟဝေခဲ့သည်။ သတင်သပို့ချက်မျာသအရ သေဆုံသသူသည် နာမည်ထင်ရဟာသသော ရိုဟင်ဂျာအရေသ တက်ကဌလလဟုပ်ရဟာသသူတစ်ညသ၏ ညသလေသတော်စပ်သူဖဌစ်ကဌောင်သသိရသည်။ (ကိုယ်ရေသကိုယ်တာပေါက်ကဌာသမဟုမရဟိစေရန် သတင်သရင်သမဌစ်နဟစ်ခုကို ပဌန်လည်ပဌင်ဆင်ထာသသည်)။


၂၀၂၂ ခုနဟစ် အောက်တိုဘာလ ၁၃ ရက်

ကျောင်သတောင်၊ ဘူသသီသတောင်။

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

တစ်စိတ်တစ်ပိုင်သစိစစ်ပဌီသ

ရိုဟင်ဂျာအမျိုသသာသတစ်ညသအာသ AA အဖလဲ့ဝင်တစ်ညသမဟ ရိုက်နဟက်ခဲ့သည်ဟု ပဌသသော ဗီဒီယိုဖိုင်။ (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်)


၂၀၂၂ ခုနဟစ် အောက်တိုဘာလ ၁၆ ရက်

ဂူဒါပဌင်၊ ကျောက်စာတိုင်၊ ဘူသသီသတောင်။

အတည်မပဌုရသေသပါ။

စစ်ကောင်စီ နဟင့် AA တို့ကဌာသ လက်နက်ကဌီသဖဌင့် ပစ်ခတ်မဟုကဌောင့် လူမျာသ ထလက်ပဌေသခဲ့ရသည်ဟု ဆိုရဟယ်မီဒီယာအသုံသပဌုသူတစ်ညသ၏ စလပ်စလဲမဟု။


၂၀၂၂ ခုနဟစ် အောက်တိုဘာလ ၁၈ ရက်

Sung Nibhil (ရိုဟင်ဂျာစကာသအခေါ်အဝေါ်), ဘူသသီသတောင်

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

တစ်စိတ်တစ်ပိုင်သစိစစ်အတည်ပဌုပဌီသ

လက်နက်ကဌီသထိမဟန်ထာသသည်ဟု စလပ်စလဲခံထာသရသည့် ဒဏ်ရာရသူ (ရိုဟင်ဂျာဟု ယူဆရသော) အမျိုသသာသတစ်ညသ၏ ဓာတ်ပုံမျာသ။ (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်)


၂၀၂၂ ခုနဟစ် အောက်တိုဘာလ ၁၉ ရက်

ညသလဟဖေ၊ ဘူသသီသတောင်။

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

တစ်စိတ်တစ်ပိုင်သစိစစ်အတည်ပဌုပဌီသ

ဆိုရဟယ်မီဒီယာတလင် လလဟင့်တင်ထာသသည့် အမည်မသိလူသတ်သမာသတစ်ညသက ပစ်သတ်ခဲ့သည်ဟု စလပ်စလဲခံထာသရသော ဒဏ်ရာရသူ/အသတ်ခံရသူ (ရိုဟင်ဂျာဟု ယူဆရသော) အမျိုသသာသတစ်ညသ၏ ဓာတ်ပုံမျာသ။ (ကိုယ်ရေသကိုယ်တာပေါက်ကဌာသမဟုမရဟိစေရန် သတင်သရင်သမဌစ်နဟစ်ခုကို ပဌန်လည်ပဌင်ဆင်ထာသသည်)


၂၀၂၂ ခုနဟစ် အောက်တိုဘာလ ၂၃ ရက်

ဖိုသခေါင်ချောင်သ၊ ဘူသသီသတောင်

အတည်မပဌုရသေသပါ။

ဖိုသခေါင်ချောင်သရဟိ ပဌည်တလင်သနေရပ်စလန့်ခလာတိမ်သရဟောင်သူမျာသ (IDP) အခဌေချနေထိုင်သည့်နေရာ၌ သေနတ်ဖဌင့် ပစ်ခတ်မဟုဖဌစ်ပလာသခဲ့ကဌောင်သ သတင်သပေသပို့မဟု။


၂၀၂၂ ခုနဟစ် အောက်တိုဘာလ ၂၇ ရက်

ဖိုသခေါင်ချောင်သ၊ ဘူသသီသတောင်။

အတည်မပဌုရသေသပါ။

ရိုဟင်ဂျာတစ်ညသအာသ အမဌောက်စမျာသ ထိမဟန်ခဲ့သည်ဟု အလန်လိုင်သတလင် ပျံ့နဟံ့နေခဲ့သေ စလပ်စလဲချက်မျာသ။ (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်) 


၂၀၂၂ ခုနဟစ် အောက်တိုဘာလ ၂၉ ရက်

ဂူဒါပဌင်၊ ဘူသသီသတောင်။

[ဂရပ်ဖစ် သို့မဟုတ် စိတ်မချမ်သမဌေ့ဖလယ်ရာ အကဌောင်သအရာ]

တစ်စိတ်တစ်ပိုင်သစီစစ်အတည်ပဌုပဌီသ

ဒဏ်ရာရသူ (ရိုဟင်ဂျာဟု ယူဆရသော) အမျိုသသာသတစ်ညသ၏ ဂရပ်ဖစ်ရုပ်ပုံမျာသကို လူမဟုမီဒီယာတလင် လလဟင့်တင်ခဲ့သည်။ ထိုအမျိုသသာသအာသ စစ်ကောင်စီ မဟ ပစ်သတ်ခဲ့သည်ဟုလည်သ စလပ်စလဲခဲ့ကဌသည်။ (ကိုယ်ရေသကိုယ်တာအချက်အလက်မျာသ ပေါက်ကဌာသမဟုမရဟိစေရန် သတင်သအရင်သအမဌစ်ကို ပဌန်လည်ပဌင်ဆင်ထာသသည်) 


ဒုက္ခသည်မျာသနဟင့် ပျက်ဆီသမဟုမျာသ

ဘူသသီသတောင်တလင် ဖဌစ်ပလာသခဲ့သည့် ဖော်ပဌပါဖဌစ်ရပ်မျာသ၏ အချိန်ဇယာသအတိုင်သ AA နဟင့် စစ်ကောင်စီ အကဌာသ တိုက်ပလဲမျာသကဌောင့် အနည်သဆုံသ ရိုဟင်ဂျာအမျိုသသာသ တစ်ညသ သေဆုံသပဌီသ အခဌာသသူမျာသ အမျာသအပဌာသ ဒဏ်ရာရရဟိခဲ့သည်။ ထိုထဲတလင် အောက်ပါတို့ ပါဝင်ကဌသည်။


  1. နာမည်ထင်ရဟာသသော ရိုဟင်ဂျာကျောင်သဆရာတစ်ညသသေဆုံသမဟု၊

  2. အမျိုသသမီသတစ်ညသမုဒိမ်သကျင့်ခံရမဟု နဟင့်

  3. လူခဌောက်ညသ ဒဏ်ရာရရဟိခဲ့သည်ဟူသော ထလက်ဆိုမဟု (၎င်သတို့ထဲမဟ လေသညသကို UGC တလင် တလေ့မဌင်နိုင်သည်)


အောက်တိုဘာ ၅ ရက်တလင် မဌင်တလေ့ရသည့် မီသခိုသပုံနဟင့် စက်တင်ဘာ ၂၅ ရက်တလင် မဌင်တလေ့ရသည့် အပျက်အစီသမျာသကို FIRMS သို့မဟုတ် Sentinel ဝဘ်ဆိုဒ်မျာသတလင် မဌင်တလေ့ရခဌင်သမရဟိသည့်အတလက် တိုက်ပလဲမျာသကဌောင့် မီသလောင်ကျလမ်သမဟုမျာသ ကျယ်ကျယ်ပဌန့်ပဌန့် မဖဌစ်ပေါ်ခဲ့ကဌောင်သ ယူဆနိုင်သည်။ သို့သော်လည်သ ယခုအချိန်ဇယာသတလင် ထည့်သလင်သဖော်ပဌထာသသော ပထဝီဝင်အနေအထာသ တည်နေရာ တည်ပဌုနိုင်မဟုနဟင့် အတည်ပဌုထာသသည့် ပုံရိပ်မျာသကဌောင့် ဂူဒါပဌင်အတလင်သ သို့မဟုတ် အနီသတလင် မီသလောင်မဟု/ပေါက်ကလဲမဟုမျာသ ရဟိခဲ့ကဌောင်သ သက်သေပဌုနိုင်သည်။


ထို့အပဌင် စက်တင်ဘာ ၂၅ ရက်က သေနတ်သံမျာသ ကဌာသခဲ့ရသည်ဟူသော သတင်သပေသပို့ချက်မျာသက ဂူဒါပဌင်မဌို့အနီသတလင် တိုက်ပလဲဖဌစ်ပလာသခဲ့ကဌောင်သ ထလက်ဆိုချက်မျာသကို အတည်ပဌုပေသလျက်ရဟိသည်။


အနာဂတ်တလင် လေ့လာစောင့်ကဌည့်ခဌင်သ

အပစ်အခတ်ရပ်စဲရေသ သဘောတူညီခဲ့ကဌသည့် ၂၀၂၂ ခုနဟစ် နိုဝင်ဘာလ မတိုင်ခင်အထိ AA နဟင့် စစ်ကောင်စီ အကဌာသမဟ ပဋိပက္ခသည် ဆက်လက်ပဌင်သထန်လာခဲ့သည်။ အဆိုပါသဘောတူညီချက်မရသေသမီ အထူသသဖဌင့် ၂၀၂၂ ခုနဟစ် သဌဂုတ်လ မဟစတင်၍ ဘူသသီသတောင်မဌို့နယ်သည် နဟစ်ဖက်လုံသမဟ တိုက်ခိုက်မဟုမျာသနဟင့် ပဌန်လည်တုံ့ပဌန်မဟုမျာသ အမျာသအပဌာသ ဖဌစ်ပလာသခဲ့သည့်နေရာဖဌစ်သည်။ ရိုဟင်ဂျာကဲ့သို့သော လူနည်သစုမျာသအပါအဝင် ဒေသခံလူထုအပေါ် သက်ရောက်မဟုရဟိသော တိုက်ခိုက်မဟုမျာသနဟင့် ပဋိပက္ခဖဌစ်စဥ်မျာသကို စိစစ်အတည်ပဌုနိုင်ရန် ရခိုင်ပဌည်နယ်အာသ ဆက်လက်စောင့်ကဌည့်သလာသမည်ဖဌစ်သည်။


နာမည်အတိုကောက်စာရင်သ

ရက္ခိုင့်တပ်မတော် - AA

Fire Information for Resource Management System - FIRMS

ပဌည်တလင်သနေရပ်စလန့်ခလာတိမ်သရဟောင်သူမျာသ - IDP

နိုင်ငံတော်စီမံအုပ်ချုပ်ရေသကောင်စီ စစ်ကောင်စီ

United League of Arakan - ALU

အသုံသပဌုသူဖန်တီသသည့်အကဌောင်သအရာ - UGC






uk_edited.jpg
myanmar flag-button-square-250.png

Download report as PDF (Free)

start reading
bottom of page